Plantun de Prouvènço

Pèr coumpara dos planto d'encò nostre

Saxifraga cuneifolia & Plumbago europaea

Sassifrago(-di-fueio-en-cougnet)

Saxifraga cuneifolia

Saxifragaceae

Autre noum : Sassifrajo.

Noms en français : Saxifrage à feuilles en coin, Désespoir du peintre.

Descripcioun :
Aquesto sassifrago trachis en mountagno souto lis aubre, à la sousto dóu soulèu ; fai de coulounìo. Es uno planto coumuno dins lis Aup marino (subsp. cuneifolia) pu raro en deforo. Se recounèis pulèu eisadamen à sa fausso rouseto de fueio en cougnet e à sa cambo nuso que porto quàuqui flour blanco tacado de jauno e de pau-duro. Li fueio soun bourdado d'uno cimousso escariouso blanco de 0,1 mm de larg.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Pichoto planto lignouso
Taio : 5 à 25 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Saxifraga
Famiho : Saxifragaceae

Ordre : Saxifragales

Coulour de la flour : Blanco
Petalo : 5
Ø (o loungour) flour : 0,5 à 0,8 cm
Flourido : Printèms - Estiéu

Sòu : Si (Ca)
Autour basso e auto : 600 à 2300 m
Aparado : Noun
Mai à juliet

Liò : Bos fres - Roucas à l'oumbro
Estànci : Mountagnard à Subaupen
Couroulougi : Ouroufito-Sud-Éuroupenco
Ref. sc. : Saxifraga cuneifolia L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.